الثانوية العامة _ 50 % مش فاشل

وانا فى سنك يعنى وانا فى ثانوى ..كن نفسى حد يفهمنى الكلام ده ..بجد !!

انا عاوزة اكلم الناس اللى حسة الدنيا وقعت ومبقاش ليها لازمة عشان جابت مجموع اقل من اللى كانت بتحلم بيه فى #ثانوية_عامة

انا نفسى اطولك واتكلم معاك ونفسى تكون بتقرا ده!

فى ناس كتير برة البلد بتاعتنا مكملوش تعليمهم وبقوا حاجة كبيرة جدا ... برة البلد يعنى ممكن يكون التعليم برة احسن من هنا بكتير ومع ذلك مكملوش وعملوا شركات كبيرة وهما من اغنى الناس فى العالم انت تقدر تدور عليهم فى Google

البلد ديه مبقتش بلد شهادات  .. مقصدش انك متتعلممش بس اقصد ان شهادتك ديه مبقاش معناها انك فاهم وانك تقدر تعمل حاجة او تشتغل.يعنى كام واحد اتخرج من طب ومشتغلش ؟ كام واحد اتخرج من هندسة وملقاش الشغل اللى عاوزه وسيان باقى الكليات

الموضوع مبقاش مجموع عالى

عارف الموضوع ايه ؟ الموضوع انت مين وعايز ايه ؟

بتحب تعمل ايه وبتعرف تعمل ايه ؟ كل ماقدرت تكتشف ده بدرى كل ماقدرت تنجح بدرى

الحياة مليانة بدايل ومليانة حاجات كتير ممكن توصلك لهدف قريت من كام يوم ال status  ديه وعجيتنى اوى

انت هتخيل انك دلوقتى داخل كلية انت مش حاببها ولا عاوزها ..او فى الاخر رسيت على معهد سنتين

وداخل مش طايق نفسك ومش عاوز الكلية بس لأن مجتمعنا مريض بالشهادات فانت عاوز يبقى معاك حتى لو دبلوم تمشى بيه حالك

انت مش فاشل ..انت ماشى فى طريق مش طريقك ..متكتأبش ..اقصد انت عندك طريقك اللى انت جامد فحت فيه ..محتاج تدور عليه

ماهو انت مش كمالة عدد وربنا خلقك عشان انت مميز جدا فى حاجة مش عند ال مليار اللى عايشين على الارض

طب ازاى ممكن تعمل ده فى كذا طريق منهم ده :

•      الطريق الاولانى 

عارف انا اعرف ناس كانوا عاوزين طب وجالهم علوم ..الناس ديه دخلت وتفوقت وبقت حاجة كويسة اوى فى المكان ده

فرصتك فى اى مكان انت رايح له كبيرة اوى انك تكون حد ناجح بشرط انك تكون واثق انك تقدر تعمل ده

جتلك اداب من بعد حلمك بسياسة واقتصاد اللى معرفش بيدخلوها ليه ديه :P

ادخل ذاكر وعافر وابقى من المتميزين ودور من وانت فى سنة اولى على طريقك بعد التخرج هتعمل ايه وهتوصل ازاى ليه ..صدقنى هتنجح ..متستسلمش ..وجودك فى المكان اكيد عشان سبب !

المهم ترسم طريقك ..وتعرف هتعمل ايه امتى وازاى ..اسأل غيرك خد خبرة من الناس اللى حواليك

•       الطريق  التانى

هفترض انك خلاص مقفلة معاك ومش لاقى نفسك فى المكان اللى انت اتحطيت فيه .الدنيا مش هتقف ..الدنيا فيها حاجات كتير لطيفة

      

• اعرف انت بتحب ايه وايه المجالات اللى انت ممكن تدوس فيه

افتح جوجل و اكتب مجالات العمل فى مصر/  مجالات العمل على الانترنت واقرا وشوف انت ممكن تبدأ تعمل ايه

 

•   هتمشى أزاى ؟

    بعد ما خرجت من اول مرحلة انت مثلا شاطر فى الرسم او التصميم ..ها ايه اللى بعد كدة

 ابدأ شوف كورسات اونلاين اتعلم ازاى تصمم 

 و ايه البرامج اللى ممكن تستخدمها عشان تصمم ..شوف المواقع اللى ممكن تفيدك وادخل اقرا واتعلم جيب نماذج من ناس مصممين شاطرين وقلدهم ولو انت حابب فعلا الموضوع هتبقى احسن منهم ..شوف صفحات على الفيس بوك بتتكلم عن التصميمات ..اعمل شغلك وخليك معاك واشتغل كتير واتعب

•   عاوز فلوس

 هتيجى مرحلة انك عاوز فلوس ..ابدأ دور على شغل freelancing ..يعنى عمل حر يعنى تشتغل حر نفسك مش تشتغل عند حد . ممكن تقرا اكتر عن ده من هنا https://www.facebook.com/mg.freelancer/posts/902051523154907

او ممكن متشتغلش على الانترنت ..

جمٌع شوية معلومات عن اماكن بتحتاج ناس بتصمم زى مثلا : شركات دعايا ,محلات تصوير , مطابع ....الخ

وانزل وريهم شغلك ووريهم انت ممكن تعمل ايه

الموضوع مش بالبساطة ديه ..لأن الموضوع محتاج تعب محتاج صبر محتاج تسيب حاجات زى القعدة بلا هدف على الانترنت بالساعات زى الشات والخروجات الكتير وكدة ..محتاج تركيز

•        طريق تالت

فكرة او حلم من زمان انت نفسك فيه ..وده اتجاه بيعجبنى انا شخصيا ..مثال من واقع حياتى ...فى واحد تعليمه مش الفظيع كان بيحلم يبقى عنده معرض موبيليا كبير وبيكسب ..بدأ صغير اصغر من لاشئ اشتغل عند ناس و تعب جدا ... جمع فلوس و السنة اللى فاتت وبعد 5 سنين قدر يبقى عنده معرض

ده بجد ..

ده واحد شايف هدفه وعارف هو عاوز ايه ..عارف هيمشى ازاى

وده مجال ناس بقى بيتسموا "رواد اعمال " / "entrepreneurs "

ادخل مسابقات بفكرتك ..فى مبادرات كتير بتاخدك وتدخلك مسابقات وتعلمك ازاى تعمل دراسة جدوى وحاجات للمشروع ولو كسبت يدوك فلوس تبدأ ..  شوف من هنا كدة  مسابقات ريادة اعمال

وده اللى انت كمان عاوزه اعرف انت عاوز ايه ..متخلش حاجة ولا حاجة زى ثانوى والمجموع توقفك

كل يوم انت ممكن  تتغير ..كل يوم سابق نفسك عشان تبقى احسن حاجة

انت حاجة مفيش على الارض حاجة زيها ..دور على انت متميز فيه عشان تلاقى نفسك

سيبك من بابا و ماما واخواتك وصحابك اللى شايفينك اقل عشان مجموعك اقل

انت مش زى حد ...بكرة اما هتنجح هيصقفولك وهيتنسى كل الهرى اللى كانوا بيقولوه

متخليش حاجة تحبطك ...انت تقدر تعمل وتتعلم  كل حاجة ! افتكر الناس اللى ربنا خلقهم عمى وعرج وغيره بس هما من احسن الناس ..ملكش حجة انت مش ناقص انت عندك كل حاجة تخليك حاجة كبيرة عندك نفسك!

لو فى حاجة مش عارف تفكر فيها قولى ممكن افكر معاك/ى ....انت مش فاشل !